shadow

KWAGH-HIR: ALÔM MAN IJONGOR KUA YAIORKUNGUZWA

Kwaghalôm  wan nahan ga.

Yange ne ga yô, Alôm mough er, una yem ikyôr ken toho.  Tsô a tôô antyôgh a har sha vande maa gba yemen. 

Za nôôr  ken toho yô, maa a gba yaren ikyôr.  Ngur ningir yô, a za ande sha Ijongor yav ver iniôndo nyian bong.  Tsô Alôm hen er ka usu, maa wa ityogh a min gberen je er una dugh usu una keer!  Alôm tsehe Ijongor ityô ka za nyer keregh ka tseen un yô, maa nure gagher nder, maa kighir tema sha.  Kunda Alôm iyol.

Er Ijongor nderen yô, a pine Alôm er: un yav doo un mimi, man i er nan man Alôm a va nderen unu?  Lan Alôm ishima tsô a kaa er, un er iniôngo ve un va nderen Ijongor er a za a za ma msorom ye.  Tsô, Ijongor kaa a Alôm er, yô vea yem ase.  Tsô, Alôm hemen maa Ijongor cir.  Mba za nyôron sha ya yô, Alôm kar fese za kaa a kwase na Anjieke er, un vea Mbaatondokyaan, ve mough fese ve za kese mngerem ve va iv shin itye, maa Anjieke a tôô an-mwe man an-mke a urugh sha min, yô a kese a va na ve sha ate.

Er Anjieke ungwa kwagh ne yô, lan un ishima tsung, a kaa er Alôm ka a tsa tsô a za kpera ikyaa a va a min, shin ka di hanma imô neo?  Tsô, a yila Atondokyaan vea Abyarusu ve yem shin wagh ve za kese ngerem, shi Anjieke er er Alôm ôr un nahan. 

Tsô a gbede msôrom mera hen kuca poo, a due a min, a za na Alôm vea Ijongor sha ate.  Alôm gema msôrom mera na Ijongor er a ma, maa Ijongor ngohol ta shin min ndere.  Tsô, Ijongor kaa a alôm er, a ôr un kwagh ua yer un yô. Tsô Alôm ta ikyenge yila Anjieke er, a va a msôrom, shi Anjieke kese msôrom mera hen ikuca ihiar due va na Alôm sha ate.  Ijongor shi tôô ta shin min ndere.  Tsô, shi a pine Alôm er, ka nyi je Alôm a yer un ase?  Tsô, shi Alôm yila Anjieke er a tôô msôrom mera cii a due a min, maa Anjieke tôô ityegh ki msôrogh kila cii due a mi va na Alôm sha won.  Ijongor tôô ityegh ki msôrogh kila cii shi ta shin min ndere, shi hile sôr pine Alôm er, ka nyi jim a yer un ase?  Tsô, Alôm kaa er, Anjieke a er msôrom mtem mtar yô, a tôô cii a due a min.

Anjieke shi er er  Alôm kaa un nahan.  Hegen kpa shi Ijongor tôô mtem ma msôrogh ma mtar mera cii shi ta shin min gbiam, shi hile sôr tema kaa a Alôm er, a ôr un kwagh u a yer un yô.  Tsô, Alôm kera fa kwagh u una er ga, maa ungwa ato.  Ijongor pine Alôm kwa tar cii kpa Alôm kera bugh zwa ga.

Tsô, Ijongor kaa a Alôm er, a yila kwase na kua mbayev nav cii ve va.  Tsô, Alôm ta ikyenge yila kwase na kua ônov nav cii ve va sha ate.  Tsô, Ijongor kaa a Alôm er, er Alôm a fetyô u ôron un kwagh ua yer un ga yô, a kaa Atondokyaan a kôr Anbyarusu a mena, Anjieke di a kôr Atondokyaan a mena, Alôm di a gema a mena Anjieke, yô un una gema di una mena Alôm yô una yem.

Kwagh ne kunda Alôm iyol, tsô, un vea kwase na man mbayev nav cii ve gba tilen jikii tsô, kwaghôron lu ga.  Tsô, mba ngur eren her kere-ke-kere yô, maa Yaiorkunguzwa va dugh ken!  A pine Alôm er, ka nyi i lu zan hemen hen ato na vea Ijongoro?  Alôm gba sha min nahan cii ôr un.  Yaiorkunguzwa ongo nahan yô, a kaa a Alôm er, un nenge a kwagh u zan iyol sha kwagh shon ga.  Atondokyaan a kôr Anbyarusu a mena, Anjieke di a kôr Atondokyaan a mena, Alôm di a mena Anjieke, Ijongor di a mena Alôm, yô un di una gema una mena Ijongor yô, una yem. 

Ijongor ongo nahan yô, mciem gba un iyol!  Alôm nengen nahan yô doo un, tsô a tôô ityôgh a har sha vande a gba yaren kwan kaan nahan er, i er nyian ve!  i er nyian ve!!  Ijongor  nengen nahan yô, maa nure gughur yevese tume shin toho.

Ka ape i lu man i doo u kighir or sha apera ga je ne.  Aluer u kighir or sha apera yô, alaghga we di kpa orgen nana va kighir we sha apera vough di nahan.  Shi heera tsegh ga, aluer wea hemba or kpa de gôron nan a gôr sha apera ga, alaghga gôr una va hire a cir sha a we.