shadow

KWAGH-HIR: MEEME

      U nderan: Kwagh-hir wam nahan gao)
      U lumun: Nahan gao nahan gao         ) 2x

Yange ne ga yô, Tor lu a wan, iti na er Meeme. Ngô u Meeme gema lu kwase u Tor yange soo un ga yô. Er Tor eren a kwase ne sha inja ga, shi kwagh kpa nan un ga yô, kwase ne hingir icankwase, gadia sha ashe je kpa kera doo u kenger ga. Shi Tor za maa un iyou shin akôngo. Er yange ngô u Meeme doo Tor ishima ga shi hingir icankwase yô, Meeme kpa soo ngô na ga, man shi wa un iko kpaa ga. Meeme gema lu or tato.

Tor yange lu a kasev mbagenev mba yange ve doo un ishima kpishi yô, hemban je yô, luPendatyo u Tor, i yilan un er Anangajia. Kasev mba Tor mba doon un ishima ne cii Tor maa ve ayou sha tembeya (tangeya), kpa iyou i Anangajia hemba doon cii. Kasev mba Tor mbagenev mban kpa mar ônov saa Anangajia tsegh lu ikom kwase ye. Nahan er yange tor soo Anangajia kpishi yô, Meeme kpa soo Anagajia kpa kpishi, shi wa un iko kpa doo doo. Anangajia shi lu kwase u wan akor kpishi kpaa, tsô er Meeme di kpa gema lu or tato yô, Anangajia kpa soo di Meeme kpishi gadia Meeme una za ikyôr una za wua swase yô, a va na Anangajia. Er Meeme una va a inyam ne sha aci u Anangajia man una gba burun yô a umbur ngô na ga cii. Zan zan je yô, ngô na una son un a son kpa Meeme a venda.

Tsô, yange i genegh yô, akor kôr ngô u Meeme je gande, nahan a yila Meeme a kaa a na er “Meeme wan wa, aluer wea za ikyôr kwa gen wea wua swase yô, a bunde kpa va nam myam mera tsegh kpa a doom”. Tsô, Meeme kpa rumun. Kpa mrumun na la lu u ishima imom ga. Meeme za ze ikyôr kwagen yô, za wua zege ihyo ne; Meeme hile a inyam ne va ou cica kura i kua myam kpaa gedee za na Anagajia. Er una kange myam di tsô una za na ngô na er yange ôr nahan yô, Meeme gema gbede akôngo ken ikya kuung za na ngô na. Doo ngô na kpishi gadia a lu henen er ka myam ma inyamegh man wan na a va ne un ye. Maa ngô na wua zwa ver sha mzondo je.

Tsô, ngô na za kese mngerem shin kwese, too kwa u yange Meeme kange va na un la, za saghen er una ôv myam mera una za jiidi yô, akôngo va ta ihuma tuu!!! Ngô na maa ngor vaa. Ishima vihi ngô na kpishi tsô, a yila Meeme a kaa a na er: “Meeme, kwagh u u er a mo ne, aluer ka mo m mareu yô, u za ikyôr kwa genegh yô, u kera hide ga”. Kpa Meeme ungwa dang, gema se a se ngô na kaa er, kwa genegh yô una wua inyam i hemban kehen cii. Er nahan yô, maa Meeme yevese yem kwagh na.

Tsô, kper gen yô, Meeme kange iyol shi yem ikyôr ken toho. Za nôôr yô, a kegh ikyôr je. Ka tem dôghôô yô, Meeme nenge a zege Iyar ne gba za van. Meeme se ken ahenge kaa ken ishima na nahan er: yan un kaa a ngô na je er, kwa gen yô, una wua zege inyam i hemban cii, yô de ase! Kaan nahan yô, maa a naregh ivaan a ker Iyar la, kpa Iyar ti ta ibyaregh, ivaan kar za tume ke inya; u Meeme una hile a dugh ivaan i genegh una henda sha adda ne nahan yô, Iyar za nule inyar, wa anyem i hula van, maa va gaase sha Meeme tungula ta ken nya. Antuula kpa Meeme er ga, maa kpe gutu!

Er yange Meeme za toho la tswen yô, ku za kôr un nahan je kpa or mom mom nan fa ga. Tsô, er yange shie na u hilen ikyôr kar nahan je kpa, or mom mom nan fa er ka kwagh u a er ne ga. Aikyeghe u aôndo-imegh nahan yô, i ungwa Hulông lu gberen imo yôôn ku u Meeme nahan er:

      Daaluda, Ako daludaaluda mnenge nyi (2x)
      Iya Ako a wua, Ako a wua ma kwagh ngu ga, ngu ga, ngu ga,
      Iyar wua Meeme!!

Er yange Hulông una gbe imo ne a been yô, a mough a purugh a shi a va gba ikua a ya, maa shi a yua imo a gba gberen: (gber imo shon)

Er yange ior mbagenegh hii u va ungwan imo ne yô, ve za kaa a Tor er, ve mba ungwan mba gberen imo teren Meeme er, a kpe! Kpa Tor hule ior mbera er ve yem kera, ka nyi i lu i eren wan naa? Tsô, ior mbera yem. Hulông shi purugh va gba ikua shi gba gbere imo teren Meeme er, Iyar i wua un. Hen shie ne yô, Tor iyol na kpa za ungwa. Er yange Tor ongo imo ne yô, fese je, maa yila ior nav er, ve mough ase sha fere ve yem ape Meeme ka a za ikyor la ve za ker ikom na ve tôô ve hile a min ken ya. Tsô, mbayev mba Tor er er yange i ôr ve nahan, ve za too ikom i Meeme ken toho ve hile a min ken ya.

Er yange i va a ikom i Meeme ken ya yô, ior cii va kase her. Kasev mba Tor lu vaan kua Anangajia kpaa. Ishima vihi Tor kondo, nahan a yila ior nav a kaa a ve er, ve za ker un or u eren icigh ki nderen or. Ve za, er mba zough a nan yô, maa ve va a or la sha ishigh ki Tor. Tsô, Tor ka a or la er, aluer or la fatyô u nderen Meeme yô, una na un nyityô kwagh i a soo cii. Tsô, or la yen shin toho za gber ahu, va wa, hôr doo doo maa ker hen kuca, gema kaa a Tor er, saa kwase keng nana za a icigh kira nana za wa Meeme sha zwa ve una nder a ma icigh kira ve una war ye. Tor kaa er, ngura ka kwagh u kiriki je. Tsô, yila mom ken kasev nav, ka a na er, a ngohol icigh kira a za a mi a za wa Meeme sha zwa. Er kwase la nguren zan a icigh kira yô, ikom i Meeme hii u moron hen inya, nahan Or-ci la kaa er kwase la a tile, un una fatyô u zan ikua a ikom la ga. Tsô, Tor shi tsuwa kwase na u genegh er a za a icigh. Er kwase la shi ngur zan a min yô, ikom i Meeme shi hii u moron hen inya. Shi Or-ci la yange kaa a kwase la er, un kpa a tile. Tsô Tor ta ikyenge yila Anangajia er, a va tôô cicigh a za wa Meeme sha zwa. Er yange Anangajia za benden a bende wegh sha ici tsegh tsô maa ikom i Meeme hii u moron. Anagajia hiin er, una za a icigh nahan yô, ikom mor je gba nôngon u bughur a bughur, tsô, Or-ci la kaa a na fese er, a tile, un je yô, hemba gban kera. Hanma kwase u hen ya u Tor cii, yan nan kar u zan a icigh ken ikom i Meeme kpa gba her ga.

Tso, or la pine Tor er, ma kwase kera ngu hen ya na u nana za a icigh ga zee? Tor kaa er, shi ngô u Meeme. Tsô, Or-ci la kaa er, yô, Tor a tindi i za yila ngô u Meeme a va. Tor tindi, mba za kaan ngô u Meeme yô, a venda er una va ga; tsô Tor gba zamber. Tor zamber ngô u Meeme, zamber zamber kpa lu fan ityô ga. Tsô, Tor kaa a na er, nyityô kwagh i ngô u Meeme a soo er una er man una rumun u van je kpa una er. Tsô, ngô u Meeme ka er, saa Tor una tar akondo a hii hen ityinbe na zan zan a za nyôr ape i gbir ikom i Meeme la, nahan ve una tôô icigh una zende sha akondo la zan zan man una za wa Meeme sha zwa ye. Tsô, Tor rumun maa tindi i za a uturumi-mba-akondov i za tar sha gbenda vough er yange ngô u Meeme ôr nahan. Er yange ngô u Meeme benden a bende icigh ave nahan maa ikom i Meeme hii u tenger. Yange ngô na ndyar sha akondo la tighe tighe, sha atsam sha atsam, zan zan za ar hen ape i gbir ikom i wan na la. Er yange ngô na za we a wa Meeme icigh sha zwa nahan, maa Meeme bugh ashe, me icigh yo, maa yesem maa kighir mough tema sha, ior ge ding!!! Tor kpa ahan gba un zwa.

Er yange Tor nenge kwagh ne nahan yô, doo un a ngô u Meeme kpishi. Shi Tor vaa afanyô sha ieren na i dang a ngô u Meeme ne. Kpa ishima gema vihi un a Anangajia sha er a lan kwagh shi a gem a bum un kua Meeme ve gem ngô u Meeme ve te un kera nahan. Hen shie la je, Meeme kaa er saa Tor a za maa ngô na iyou sha tembeya, kpaa Anangajiya yô, un kera soo u nengen a na ga cii. Tsô, Tor maa maa ngô u Meeme ya sha tembeya, shi na zwa er, mbayev nav ve za kôr Anangajia ve za sôngo gadia a lan kwagh yum!

Ka ape i lu man i doo u wea lu nan nan kpa wea mar wan yô, wan la nana de kera teu kera ga je ne. Meeme yange nenge ngô na lu ican ican yô, maa gema ngô na u maren un ta kera, za hemba wan shagba kwase u ter na iko. Kpa se nenge yô, kwagh va gbe yô, lu ngô na za gema war un ye.