shadow

KWAGH-HIR: NGÔ U LU GBA WAN NA IYUHE

U nderan: Kwagh-hir wam nahan gao)

U lumun:  Nahan gao nahan gao        ) 2x

Yange ne ga yô, orgenegh lu i yilan un er, Wantoraondo.  Wantoraondo ne lu or u doo ashe kpishi kpaa.  Un gema lu vea ngô na, iti na er Wanmondo. 

Yange ne ga yô, Wantoraondo za nenge a kwase doo un ishima tsung, kwase ne doo je kera doo ga.  Wantoraondo maa er kwase ne va a min hen ya na.  iti i kwase ne er: Kumashe.  Tsô, er yange Kumashe va ivaa hen ya u Wantoraondo yô, a kaa a nom na man ngô na er: un ye hanma kwaghyan cii kpa furum yô, un ye ga.  Wanmondo yange ungwa kwagh ne tsura. 

Kumashe yange yôron iwer diga, saa ngô u nom na tsegh.  Er Kumashe lu doo nom na ishima kpishi yô, shi wa un iko kpaa.  Nom na a yam un akondo a dedoo man a taver ishe kpaa.  Shi soon er kwase na a ya iyue ga saa inyam tsegh.  Er ngô u nom u Kumashe kenger kwagh ne dông yô, ishima na iv a iyuhe.  Gadia a kenger gbang  yô, yange Kumashe lu a va ivaa hen wan na ga yô, ve hemban yan iyue a inyam, kpa hegen u kumashe a ve ne yô, wan na hembe yamen inyam sha a ci u a soo kwase na ne yum yô.  Shi Wanmondo shir ashe nenge yô, akondo a Kumashe a zeren kpa ka a taver ishe tsegh.  Akaa ne kohol cii yô, Wanmondo nenge wen er, guda di yô, kumashe ma a hir jime.  Inja na yô er; Kumashe ma a kar hen ya na kera jimin cii.

Yange i gen sev hungwa av ga yô, Wantoraondo lôhô zende, kaa a kwase na man ngô na er: un ngu zan angbiôn zende u yange mom shin ahar nahan tsegh man una hide ye.  Er Wantoraondo yemen zende la yô ngô na tema hen ken ishima sha kwagh u una er man una zenda Kumashe kera cii man wan na una hide zende la ye.  Kpenan yô, Wanmondo hen ken ishima gbang, sha kwagh u una er ve Kumashe una bee hen ya na yô.  Mhen na ne lu sha gbenda u iyuhe i i lu un ken ishima sha er wan na a hembe soon Kumashe a na la yô. 

Er Wanmondo hen  sha kwagh la gbang yô, a zua a mhen ken ishima.  A kaa nahan er:  Kumashe yange kaa er un ye furum ga!  Tsô, a pine ken ishima na er: shin aluer Kumashe ya furum nahan ka nyi ia er uneo?  Shin a vihi un nahan maa una yemou?  Shin una gba angev una kpeo?  Kwagh u un fe yô, Kumashe kaa er, un ye furum ga, nahan kwagh u una va due kera cii yô una doo Kumashe ga; nahan una er kwagh u una doo Kumashe ga yô, una nenge.

Tsô, Wanmondo mough sha je gba eren ruam.  Wanmondo yange kôr ikyegh wua, jiidi sha ishwa huma nzôugh-nzôugh je er kwar ahenga ua tondo nahan.  Yange Wanmondo jiidi iyue ne a gbaishima sha er mayange je Kumashe a de fetyô u vendan ruam u yan ga yô.  Kpa kwagh u yange gema er di yô, yange za tondo ijô i furum cuku va tser haa sha iyue la.  Tsô, er yange furum la ngee ga yô, maa ndiir shin iyue shon, nahan or kera fatyô u fan er i wa furum sha iyue shon ga.  Shi sha u nongôn er Kumashe a ya ruam la keng yô, yange Wanmondo er ruam la tighe-tighe sha er shie a za man ijen kpa i kor kpishi sha er una va veren Kumashe ruam inya yô, ijen i pir un ashe nahan a de kera ngôôr a ngôôr u yan un ga yô. 

Di er yange Wanmondo vande wan ken ishima nahan, er yange va veren Kumashe ruam inya yô, ihuma i iyue tôngo, ijen mough gba wan un akughur shin uya!  Hen shie ne yô, kwagh gen mom mom yange kera lu Kumashe ken ishima ga, saa u yan ruam tsegh.  Tsô er Kumashe va ye ruam la kera yô, a mase za kaven er i we furum sha iyue la nahan!  Ishima vihin un kpishi, gadia a fa je er, shie na bee shin tar ne je ve!  A zungwe kpishi sha er una undu Wantoraondo, nom na u lu doo un ishima kpishi la yô.  Tsô, Kumashe wuha iyôl gemee, due za tile hen ato tembe gba gberen imo vaan teren Wantoraondo nahan er:

Nomomoo Wantoraondo ua doo mo ishima la (2)

Ngôu gba u iyuhe yô, me ze war war war war

Mo ze war war war war

M ze shin mbakpenev

Mo m ze shin mbakpenev

Mo m ze sha u uma zeooo!!

Er yange Kumashe gber imo ne bee yô, maa a mire shin inya gba sha anu.  A yenge keen kua keen, kpa a nenge a nom na ga.  Tsô shi a yua imo gberen vaan teren nom na:

Nomomoo Wantoraondo ua doo mo ishima la (2)

Ngôu gba u iyuhe yô, me ze war war war war

Mo ze war war war war

M ze shin mbakpenev

Mo m ze shin mbakpenev

Mo m ze sha u uma zeooo!!

Er Kumashe gber imo ne been yô, maa a mire shin inya gba sha iwenge.

Er iyange kwagh ne lu zan hemen ken ya yô, Wantoraondo kpa ishima za hingir un ken zende hela-he-hela, kera gba fantyô u teman ken zende la ga, maa a lôhô ayem u hiden ken ya.  Er Kumashe yange una wa imo ne una kuren yô, shi a seer u miren yemen shin inya.  Shie u yange Wantoraondo hile ken ya va nôôr yô, Kumashe mire mase shin agar-acee lu masen miren shin inya ye!!  Yange Wantoraondo va fe kwagh u a er jim jim yô, ishima vihi un a ngô na tsung er una wua iyôl na nahan, maa a gba num, venda u yan kwaghyan, tsô gbaa kanden tsô, zan zan maa un kpa va kpe!!

Wantoraondo va kpeen kera yô, ngô na mase za kaven kwagh u un er yô; gadia wan na kpa kpe ve, nahan un kera ngu a or u nengen sha a na ga, un hingir kwase u ibanave.  Iyuhe na kpaa gba nahan un tar.  Wanmondo hingir u vaan afanyô tsung sha ifer na man iyuhe i lu er wan na la, kpa ihongô la yô, shie kar ve.  Wanmondo shi mase kaven er, sha mimi yô, ka wan na un er un iyuhe ga, kpa ka iyôl na je un er i iyuhe ye.

Tiv ôr injakwagh er: ‘iyuhe ka mtwem’.  Inja na yô er, ka wea haa mtuhem kera ma hile ma cir sha a we nahan, ka ape ka wea er or iyuhe ve i hile i kur a we je la.  Nahan doo u hanma or u nan lu a awashima u eren orgenegh iyuhe yô, nana vande henen sha injakwagh ne kua ieren i Wanmondo ne, alaghga iyuhe i u soo u eren or la ia va hingir we mtwem, a hile a cir sha a we.