shadow

KWAGH-HIR: NOM IKYUEN MAR ÔNOV

Kwaghalôm wan nahan ga.

Yange ne ga yô, Alôm ta hwande vea Tor er una hemba Tor hwande keng, gadia Tor kaan er or ngu u nana hemba un hwande ga. Tsô Tor kaa a Alôm er, aluer un di nahan kpa una hemba un hwande yô, una na un zege gumbua u hemban cii. Alôm di kaa er aluer Tor hemba un hwande yô, una na un zege nomyôngo. Er ve ta hwande ve bee kera yô, maa Tor kume amar mir.

Tsô, Tor mirin amar kera yô, a yila mbanyam purututu er ve va zua hen a na. Mbanyam mba va zough yô, Tor mough tile sha kaa a ve er: un kume amar un mir, nahan hegen yô, un ngu nan hanmaor ngôbua sha er yange i vihin amar la yô, nana vaan un a ngôbua la a wan ityô yô. Nahan aluer anti or u nana va a ngobua a wan ityô sha yange la ga yô nan gba bo, nahan una wua nan kpee!!!

Kpa kwagh u Tor gema er di yô, Tor kera na Alôm ngobua er yange la una vaan un a wan ityô ga, kpaa gema na Alôm nombua er yange i vihin amar la yô, un kpaa a vaan a nombua la a wan ityô. Tsô se kera lan a lan er nom kwagh a maren ga yô. Alôm kpa venda ga, ngohol nombua la fese je.

Tsô shighen karen yô, ungô mbabuav mba ior mbagenegh cii mar ônov seer seer, lu keghen a kegh ayange a Tor una vihi amar yô. Er ior nenge er nombua u Alôm ngu a zua a wan ga man ayange a vihin amar nga zurum yô, mbagenegh doo ve ken asema ve gba ember kaan er, kwagh tser Alôm ve, ze iyol yum; kpa mbagenegh yô, kwagh la lu zan ve iyol ken asema ve lu kaan er: ku kôr a kôr Alôm je! Kpa kwagh u or môm môm nan fa ga yô, Alôm wa di ayom a na lu a min ken ishima, lu kaan er, yange i amaregh tsô ior a nenge a kwagh.

Tsô ayange a amaregh nga kom yô, maa Tor vihi amar je. Sha yange i amaregh la yô kwagh er: hanmaor u nan lu zan amar yô, nan lu a ngobua a wan ityô seeree er yange Tor kaa nahan. Yange amar ya sende kete. Ior jinge sha amar cii kpa or môm nenge a Alôm ga. Er shie va ngur zan yum yô, utamenmbaiorov tindi loho hen Tor er, amar kpaa yar sende, nahan aluer tor a lu a kwaghôron a ior yô, a due sha tembe a va lam a ve. Tor gema tindi er i pine aluer Alôm una nyôr sha amar ve yô. Kpa i tindi loho hen Tom er, Alôm ngu a nyôr ga. Nahan Tor kaa er, i yôô hen ior cii er saa Alôm una nyôr hen amar la keng man una due a va lam a ior ye. Kwaghôron la kunda ior iyol gbông, amar huan viin, inyom imôm imôm kpa kera kaa imo ga!

Ka huan viin, ka tem dôghôô yô, i ungwa vaa shin kpe waghegh corough corough. Ikpila ior num sha amar gudu gudu gba senen shin ape vaa u lu duen la. Mba za nôôr yô, ve nenge a Alôm tema sha kpe toho. Tor kpa yange ungwa vaa la, nahan un kpa mough lu van ken ijime. Ior pine Alôm er, ka nyi i er man a gbir vaa? Alôm kaa er, saa Tor una nyôr ape un lu la keng man una ôr kwagh u a er man un gbir vaa ye.

Tor va ngbôghôm ikyua yô, ior shi pine Alôm kwagh u a er ve a gbir vaa yô. Alôm kaa er, er un lu van amar un va sôôn shin kpe waghegh yô, un nenge a Nomkyuen mar ônov anieni lu karen a min shun shun shun, tsô lan un ishima ver un gbir vaa ye. Er Tor ongo nahan yô, un kpa lan un ishima maa a naregh zwa ca je a kaa a Alôm er; we ibumeor ne, nom kwagh kpa marenaa? Alôm maa tonde a Tor keera er: Ahoo! Tsô kaa ase!! Nomkwagh maren ga tsô u nem nombua we mvaan we a wan ityô ye? Mbanyam ger kyuu!! Tsô, Tor suwa ityough nya maa a kaa a Alôm er: U hemban hwande ve! Maa mbanyam shi ger ting. Tsô, Tor kôr zege gumbua ne na Alôm. Alôm di gema kôr anjuku iyôngo ne na Tor.

Ka ape i lu man, aluer wea hemba or kpa de kera hiin nan sha apera ga je ne, gadia u fa ikyuen i nan ndyar shin nguha ver nan lu suen num ga!